Development လမ်းကြောင်းကို Beginner တယောက်အနေနဲ့ ဘယ်လိုစတင်ရမလဲ

Software Development Career ကို စတင်တဲ့အခါ ရှုပ်ထွေးပြီး ဝေခွဲမရဖြစ်တတ်ပါတယ်။ ဘာကြောင့်လဲဆိုရင် ရွေးချယ်စရာတွေ အများအပြား ရှိနေတဲ့အပြင် ဘယ်နယ်ပယ်က ကိုယ်နဲ့ အလိုက်ဖက်ဆုံးလဲ ဆိုတာ ရွေးချယ်ဖို့ ခက်ခဲတဲ့အတွက်ကြောင့်ပါ။ Web Development, Mobile App Development, Data Science, DevOps စသဖြင့် အခွင့်အလမ်းတွေ များပါတယ်။ ဒီနေရာမှာ မေးစရာရှိလာတာက ဘယ်နယ်ပယ်က ကိုယ့်အတွက် အကောင်းဆုံးဖြစ်နိုင်မလဲဆိုတာပါပဲ။

ပထမဦးဆုံး မိမိ စိတ်ဝင်စားမှုကို သေချာသိဖို့လိုပါတယ်။ Design တွေလုပ်ရတာ၊ ဆန်းသစ်တဲ့ ပုံစံအသွင်အပြင်တွေ ဖန်တီးရတာ စိတ်ဝင်စားတယ်ဆိုရင် Web Development က သင့်တော်ပါတယ်။ အထူးသဖြင့် Front-End Development က အသင့်တော်ဆုံးဖြစ်မှာပါ။ HTML, CSS, JavaScript တို့ကို အသုံးပြုပြီး User Interface (UI) တွေ ဖန်တီးရမှာပါ။ Mobile App Development အပိုင်းကို စိတ်ဝင်စားရင်တော့ Flutter, React Native တို့လို Framework တွေကို လေ့လာနိုင်ပါတယ်။ Data Science, Backend Development တို့ကို စိတ်ဝင်စားတယ်ဆိုရင်တော့ Python, SQL, Algorithms, API Development စတာတွေကို လေ့လာဖို့လိုပါလိမ့်မယ်။

တချို့ beginner တွေက ဘယ်နားကနေစရမလဲ မသိသေးတာမျိုးတွေ ဖြစ်တတ်ပါတယ်။ အဲဒီလိုဆိုရင် နယ်ပယ်မျိုးစုံကို အနည်းကျဉ်းစမ်းသပ်ကြည့်ဖို့ လိုပါမယ်။ အချိန်ယူပါ။ လတ်တလော ချက်ချင်းဆုံးဖြတ်ဖို့ မလိုအပ်ပါဘူး။ မတူညီတဲ့ နယ်ပယ်တွေကို တဖြေးဖြေးအကြမ်းဖျဉ်း နားလည်လာအောင် ပြုလုပ်သင့်ပါတယ်။

Website အသေးစားလေးတွေ ရေးပါ။

Mini Scripts သေးသေးလေးတွေဖန်တီးပါ။

Project လေးတွေ စမ်းကြည့်ရင်း ကိုယ့်အတွက် ပိုပျော်ရတဲ့ နယ်ပယ်ကို ရှာဖွေနိုင်ပါတယ်။

ဖြေးဖြေးချင်း သဘောပေါက်လာတဲ့အခါ ကိုယ်စိတ်ဝင်စားတဲ့ နယ်ပယ်ရဲ့ Language တွေ၊ Tool တွေကို အသေးစိတ် လေ့လာရပါတော့မယ်။

Web Development ကို စိတ်ဝင်စားရင် React ဒါမှမဟုတ် Next.js ကို စလေ့လာသင့်ပါတယ်။

Data Science ကို စိတ်ဝင်စားရင် Python က ရွေးချယ်စရာအကောင်းဆုံးပါပဲ။ အရေးကြီးတာက တပြိုင်တည်း အကုန်လုံးကို လေ့လာဖို့ မလိုအပ်ဘူးဆိုတာပါပဲ။ တဖြည်းဖြည်းစီ လေ့လာရင်း နားလည်လာအောင် ကြိုးစားရမှာပဲ ဖြစ်ပါတယ်။

နောက်ထပ်အရေးပါတဲ့ အချက်တချက်က Development နယ်ပယ်ကို စတင်မယ့်သူတွေအနေနဲ့ သက်ဆိုင်ရာ Job Market ကိုလည်း လေ့လာထားသင့်ပါတယ်။

လက်ရှိ Market မှာ ဘယ် Skills တွေ Popular ဖြစ်နေတယ်?

ဘယ်နယ်ပယ်မှာ Demand ပိုများတယ်?

High Salary Jobs တွေ ဘယ်လိုအခွင့်အလမ်းတွေရှိတယ်?

စတဲ့ အချက်တွေကို ထည့်သွင်း စဉ်းစားထားသင့်ပါတယ်။

ဂရုပြုရမှာက အရာအားလုံးကို တခါတည်း မလေ့လာဖို့ပါပဲ။ Development နယ်ပယ်ဆိုတာ လေ့လာရင်း၊ သင်ယူရင်း၊ စမ်းသပ်ကြည့်ရင်းနဲ့ တဆင့်ချင်း ဖြတ်သန်းသင်ယူရတာဖြစ်ပါတယ်။

ဘာကို စလုပ်မယ်လို့ မဆုံးဖြတ်နိုင်ဘဲ ထိုင်စဉ်းစားနေရင် အချိန်ကုန်သွားမှာပါ။ တခုခု စလုပ်လိုက်ပါ။ လုပ်ရင်းနဲ့ ကိုယ်ဘာကို သိချင်သလဲ၊ ဘယ်ပိုင်းမှာ အခက်အခဲဖြစ်တယ်ဆိုတာ ပိုပိုပြီး သိလာနိုင်မှာဖြစ်ပါတယ်။

Let’s all become 10x developers! 💪