Web Hosting ဆိုတာ ဘာလဲ

Hosting ဆိုတာ ကျွန်တော်တို့ ဖန်တီးထားတဲ့ Website တွေကို လူတိုင်း အင်တာနက်ကနေ ဝင်ရောက်ကြည့်ရှုနိုင်ဖို့အတွက် မရှိမဖြစ်လိုအပ်တဲ့ ဝန်ဆောင်မှုတစ်ခုပါ။ ရိုးရိုးရှင်းရှင်းပြောရရင် ကိုယ့် Website ရဲ့ ဖိုင်တွေ (စာသား၊ ရုပ်ပုံ၊ ဗီဒီယို၊ code စတာတွေ) ကို အင်တာနက်ပေါ်မှာ သိမ်းထားပေးတဲ့ "နေရာ" လို့ ပြောလို့ရပါတယ်။ ဒီနေရာကနေပဲ ကျွန်တော်တို့ရဲ့ Website တွေကို ဘယ်သူမဆို၊ ဘယ်အချိန်မဆို ဝင်ကြည့်လို့ရတာပါ။ ပိုပြီးမြင်သာအောင် ဥပမာပေးရရင်၊ ကိုယ့်အိမ်ကပစ္စည်းတွေကို သိမ်းဆည်းထားပေးနိုင်တဲ့ ဂိုဒေါင်ကြီးတစ်ခုလိုပါပဲ။ အဲ့ဒီဂိုဒေါင်ကြီးဆိုတာကလဲ အင်တာနက်နဲ့ အမြဲချိတ်ဆက်ထားပြီး ၂၄ နာရီလုံး အလုပ်လုပ်နေတဲ့ စွမ်းအင်မြင့် ကွန်ပျူတာကြီးတွေ (Server တွေ) ကို ဆိုလိုတာပါ။ ဒါမှပဲ Website တွေကို လူတွေက အချိန်မရွေး ဝင်ရောက်ကြည့်ရှုနိုင်မှာ ဖြစ်ပါတယ်။

Website တစ်ခုဆိုတာ ပုံမှန်အားဖြင့် HTML, CSS, JavaScript စတဲ့ code တွေ၊ ပုံတွေ၊ ဗီဒီယိုတွေ ပေါင်းစပ်ပြီး ဖန်တီးထားတာပါ။ ဒီဖိုင်တွေကို ကိုယ့်ကွန်ပျူတာထဲမှာပဲ သိမ်းထားပြီး Run လို့ရပေမဲ့၊ တခြားလူတွေ ကြည့်ဖို့ဆိုရင် ကိုယ့်ကွန်ပျူတာကို ၂၄ နာရီလုံး ဖွင့်ထားပြီး အင်တာနက်နဲ့ အမြဲချိတ်ဆက်ထားမှရပါမယ်။ ဒီလိုအခြေအနေမျိုးက လက်တွေ့မှာ ခက်ခဲပြီး စွမ်းအင်တွေကို အလာဟဿ ဖြစ်စေပါတယ်။ ဒါကြောင့်ပဲ Web Hosting Provider တွေပေါ်ပေါက်လာခဲ့တာပါ။

Web Hosting Provider တွေဆိုတာ Website တွေ သိမ်းဆည်းဖို့အတွက် အထူးပြုလုပ်ထားတဲ့ စွမ်းအားမြင့် ကွန်ပျူတာတွေ တနည်းအားဖြင့် Server တွေကို ပိုင်ဆိုင်ထားတဲ့ ကုမ္ပဏီတွေ ဖြစ်ပါတယ်။ ဒီ Server တွေက တစ်ရက်ကို ၂၄ နာရီ၊ တစ်ပတ်ကို ၇ ရက် အမြဲတမ်း အင်တာနက်နဲ့ ချိတ်ဆက်ထားပြီး Website တွေကို သိမ်းဆည်းပေးထားပါတယ်။

Website တစ်ခုကို လူတစ်ယောက်က ဝင်ကြည့်တဲ့အခါ ဘယ်လို အဆင့်တွေ ဖြတ်သန်းရသလဲဆိုတာ အောက်မှာ ဖော်ပြထားပါတယ်။

(က) ပထမဆုံးအနေနဲ့ သုံးစွဲသူရဲ့ Browser ကနေ Domain Name System (DNS) ဆီကို ချိတ်ဆက်ပါတယ်။ DNS ဆိုတာ အင်တာနက်ပေါ်က လမ်းညွှန်ပေးတဲ့ ဖုန်းစာအုပ်ကြီးလိုပါပဲ။ ဥပမာ - "example ဒေါ့ကွန်း" ဆိုတဲ့ Domain က ဘယ် Server ရဲ့ IP Address နဲ့ သက်ဆိုင်လဲဆိုတာ မှတ်တမ်းတင်ထားတာမျိုးပါ။

(ခ) DNS ကနေ IP Address ကို ရတာနဲ့ Browser က အဲ့ဒီ IP Address ရှိတဲ့ Hosting Server ဆီကို Request တစ်ခု ပို့လိုက်ပါတယ်။ သက်ဆိုင်ရာ Website ဖိုင်တွေကို တောင်းဆိုဖို့ပါ။

(ဂ) Hosting Server က အဆိုပါ Request ကို လက်ခံရရှိတာနဲ့တပြိုင်နက် သက်ဆိုင်ရာ Website ရဲ့ ဖိုင်တွေကို ရှာဖွေပြီး Browser ဆီ ပြန်ပို့ပေးပါတယ်။

(ဃ) နောက်ဆုံးမှာတော့၊ Server ကနေ ပေးပို့လိုက်တဲ့ ဖိုင်တွေကို Browser က ဖတ်ပြီး ကျွန်တော်တို့ တွေ့မြင်ရတဲ့ Website ပုံစံအဖြစ် ပြောင်းလဲ ဖော်ပြပေးတာ ဖြစ်ပါတယ်။

Hosting အမျိုးအစားတွေ

Hosting က အမျိုးမျိုး ရှိပါတယ်။ ကိုယ့် Website ရဲ့ လိုအပ်ချက်၊ Budget ပေါ်မူတည်ပြီး ရွေးချယ်နိုင်ပါတယ်။

Shared Hosting: ဒါကတော့ အသုံးအများဆုံးနဲ့ ဈေးအသက်သာဆုံး Hosting အမျိုးအစားပါ။ ကိုယ့် Website ရဲ့ ဖိုင်တွေကို တခြား Website တွေနဲ့ Server တစ်လုံးတည်းမှာ ဝေမျှပြီး သိမ်းဆည်းပါတယ်။ ဥပမာအနေနဲ့ ပြောရရင် တိုက်ခန်းတစ်ခုကို လူအများကြီး ဝေမျှနေထိုင်သလိုမျိုးပါပဲ။ ဈေးသက်သာပေမဲ့ တခြား Website တွေက Traffic များရင် ကိုယ့် Website ပါ နှေးသွားနိုင်တာမျိုးတော့ ရှိပါတယ်။

VPS (Virtual Private Server) Hosting: VPS ကတော့ Shared Hosting ထက် ပိုပြီး စွမ်းဆောင်ရည် ကောင်းမွန်ပါတယ်။ Server တစ်လုံးတည်းကိုပဲ သီးသန့်ပိုင်းခြားပြီး ကိုယ်ပိုင် Virtual Server တစ်ခုစီလိုမျိုး သုံးနိုင်တာပါ။ ကိုယ့်အတွက် သီးသန့် Resource တွေ (CPU, RAM စသည့်ဖြင့်) ရတာကြောင့် Shared Hosting ထက် ပိုမြန်ပြီး လုံခြုံရေးလည်း ပိုကောင်းပါတယ်။ တိုက်ခန်းတစ်ခန်းကို ပိုင်ဆိုင်ပြီး သီးသန့်နေထိုင်ရသလိုမျိုးပေါ့။

VPS မှာ SSH (Secure Shell) နဲ့ Server ကို ချိတ်ဆက်ပြီး File တွေ Manage လုပ်တဲ့ နမူနာ Command တွေကို ဖော်ပြထားပါတယ်။

ssh username@your_vps_ip_address
ls -l /var/www/html/ 
# Apache web server ကို restart လုပ်ခြင်း
sudo systemctl restart apache2 

Dedicated Hosting: ဒါကတော့ အမြင့်ဆုံး Hosting အမျိုးအစားပါ။ Server တစ်လုံးလုံးကို ကိုယ်တစ်ယောက်တည်း သီးသန့်ပိုင်ဆိုင်ပြီး သုံးရတာပါ။ စွမ်းဆောင်ရည် အမြင့်ဆုံးနဲ့ လုံခြုံရေး အကောင်းဆုံး ဖြစ်သလို ဈေးလည်း အကြီးဆုံးပါ။ ကိုယ်ပိုင်အိမ်ကြီးတစ်လုံးကို ပိုင်ဆိုင်ပြီး နေထိုင်ရသလိုမျိုးပါပဲ။ Traffic အင်မတန်များတဲ့ Website တွေ၊ e-commerce လုပ်ငန်းတွေအတွက် သုံးကြပါတယ်။

Dedicated Server မှာ Nginx Web Server ကို Configuration လုပ်ထားတဲ့ နမူနာကုဒ်ဖိုင်တစ်ခုကို ဖော်ပြထားပါတယ်။

server {

    listen 80;

    server_name yourdomain.com www.yourdomain.com;

    root /var/www/yourdomain.com/public_html;

    index index.html index.htm;

location / {

        try_files $uri $uri/ =404;

    }

    access_log /var/log/nginx/yourdomain.com.access.log;

    error_log /var/log/nginx/yourdomain.com.error.log;

}

Cloud Hosting: ဒီ Hosting ကတော့ အခုနောက်ပိုင်း ခေတ်စားလာတဲ့ အမျိုးအစားပါ။ Website ဖိုင်တွေကို Server တစ်လုံးတည်းမှာ မသိမ်းဘဲ Server အများအပြားရှိတဲ့ Network မှာ ဖြန့်ကျက် သိမ်းဆည်းထားတာပါ။ ဒါကြောင့် Website Traffic ရုတ်တရက် တက်လာရင်တောင် တခြား Server တွေကနေ အလိုအလျောက် ဖြည့်ဆည်းပေးနိုင်တာကြောင့် Website ကျသွားတာမျိုး မရှိတော့ပါဘူး။ စွမ်းဆောင်ရည်ရော လုံခြုံရေးပါ ကောင်းမွန်ပြီး Traffic ပေါ်မူတည်ပြီး သုံးသလောက် ပေးချေရပါတယ်။

Cloud Hosting (AWS S3) မှာ Static Website တစ်ခုကို Deployment လုပ်တဲ့ နမူနာ Python Script တစ်ခုကို အခုလိုရေးနိုင်ပါတယ်။

import boto3

s3 = boto3.client('s3')

bucket_name = 'my-cloud-website-bucket'

# Bucket ဖန်တီးခြင်း

s3.create_bucket(Bucket=bucket_name, CreateBucketConfiguration={'LocationConstraint': 'ap-southeast-1'})

# HTML ဖိုင် Upload လုပ်ခြင်း

s3.upload_file('index.html', bucket_name, 'index.html', ExtraArgs={'ContentType': 'text/html'})

ဘယ် Hosting အမျိုးအစားကို ရွေးရမလဲဆိုတာကတော့ ကိုယ့် Website ရဲ့ အရွယ်အစား၊ အသုံးပြုသူ အရေအတွက်၊ Budget စတာတွေပေါ် မူတည်ပြီး ဆုံးဖြတ်ရမှာပါ။

နိဂုံးချုပ်အနေနဲ့ ပြောရရင် Hosting ဆိုတာ ကျွန်တော်တို့ရဲ့ Website တွေကို အင်တာနက်ပေါ်မှာ မြင်သာအောင်၊ လူတိုင်းဝင်ရောက်ကြည့်ရှုနိုင်အောင် ဖန်တီးပေးတဲ့ အခြေခံအကျဆုံး ဝန်ဆောင်မှုတစ်ခုပဲ ဖြစ်ပါတယ်။ ကိုယ်ရေးထားတဲ့ Code တွေကို လူတိုင်းဝင်ရောက်ကြည့်ရှုနိုင်ဖို့၊ ကိုယ်ဖန်တီးထားတဲ့ Website လေး အသက်ဝင်လှုပ်ရှားနိုင်ဖို့ Hosting က မရှိမဖြစ်လိုအပ်ပါတယ်။

အစပိုင်းမှာ Shared Hosting လိုမျိုး ဈေးသက်သာပြီး အသုံးပြုရလွယ်ကူတဲ့ Hosting တွေကို စမ်းသပ်လေ့လာရင်းနဲ့ တဖြည်းဖြည်း Website ရဲ့ လိုအပ်ချက်တွေ များလာတာနဲ့အမျှ VPS ဒါမှမဟုတ် Cloud Hosting လိုမျိုး ပိုမိုကောင်းမွန်တဲ့ Hosting အမျိုးအစားတွေကို ပြောင်းလဲအသုံးပြုဖို့ အကြံပြုလိုပါတယ်။

ဒီလိုမျိုး Hosting တွေရဲ့ အလုပ်လုပ်ပုံကို အတွင်းကျကျ နားလည်ထားခြင်းက Web Developer တစ်ယောက်အနေနဲ့ Website တွေတည်ဆောက်တဲ့အခါ၊ ပြဿနာတွေ ရှာဖွေဖြေရှင်းတဲ့အခါမှာ အများကြီးအထောက်အကူပြုစေမှာ အသေအချာပါပဲ။